Mens wonder hoekom ’n boek soos Reg en Onreg: Kaapse regspraak in die 18de eeu so moeilik is om in die hande te kry? Navorsers vind Reg en Onreg uiters waardevol en dis waarom die Nasionale Argief hierdie boek in sy naslaanbiblioteek opgeneem het – waar dit soveel gebruik is dat dit aan flarde was en onwederregtelik deur die argivarisse gefotostateer is sodat die enigste gerukte eksemplaar darem behoue kan bly. Via Ancestry24.com kan lesers nou dié probleem systap.

Genealoë en historici ken Hans Heese as oud-akademikus, skrywer en gewaardeerde spreker by geleenthede soos kultuurhistoriese konferensies.

Reg en Onreg het in 1994 verskyn en is steeds myns insiens die beste bron aangaande die betrokke onderwerp, veral omdat dit so maklik lees. Heese noem in die eerste hoofstuk nog bronne, waardeur die belangstellende sy/haar kennis kan verbrei – so kan ’n redelik volledige beeld van die tydsgees destyds, nie net plaaslik nie, maar ook in Europa verkry word. Die belangrikste bydrae van dié boek is juis die kontekstualisering waarsonder geen werklike begrip van die (vir ons) wrede wêreld en krasse waardes van weleer moontlik is nie. Hierdie werk is ’n uitstaande navorsingsbron vir enigiemand wat belangstel in ons vroeë geskiedenis – nie net die regsgeskiedenis nie. Heese bespreek die verskillende groepe: die Europeërs, inheemse mense én die slawe om die beurt. Kulturele verskille word dus in ag geneem.

Lees die volledige resensie hier.

Dr. Francois P. Verster, Argivaris van Naspers, voorheen verbonde aan Die Kaapse Argief (1991 – 2007).